Watuhumiwa Mara wawaua wanaoipinga uvuvi haramu.

Watu wawili wameuawa kwa kupigwa na makasia na mawe baada ya kuwazuia wavuvi watatu kuvua samaki kwa kutumia sumu katika ziwa Viktoria.

Tukio hilo limetokea katika kijiji cha Kiyemba kata ya Nyakande wilayani Butiama mkoani Mara.

Waliofariki wametajwa kuwa ni Sanya Rwanya mkazi wa Kijiji cha Kiemba na Kingi Magesa mkazi wa kijiji cha Kabegi kata ya Nyakatende.

Diwani wa kata hiyo Mheshimiwa Jerald Kasonyi amesema vitendo vya uvuvi haramu vimekithiri katika kata hiyo jambo ambalo limesababisha wavuvi haramu kutumia fursa iliyopo kufanya shughuli zao bila vificho hali inayochangia wananchi kijaribu kupambana nao.

Ameongeza kuwa alipata taarifa za tukio hilo la kuuawa kwa watu hao kuwa wavuvi wawili wameuawa na wavuvi haramu wa kutumia sumu hali iliyomlazimu kuwasiliana na uongozi wa jeshi la polisi ili uweze kuwasaidia.

Mwenyekiti wa kijiji hicho Aliphonse Magati amesema vitendo hivyo vimekuwa vikiwaogopesha wananchi wa kijiji cha Kihemba kufanya shughuli za uvuvi na kuongeza kuwa serikali iwasaidie katika kukabiliana na matukio ya uvuvi haramu kijijini humo.

Nao wananchi wa vijiji hivyo wameiomba serikali kuwahakikishia usalama wao kwa kuweka doria katika maeneo mbalimbali ya Ziwa Viktoria.

Vitendo vya uvuvi haramu vimekithiri kwa kiasi kikubwa katika ziwa ViKtoria mkoani Mara hali inayoelezwa na wavuvi kuwa ni kushindwa kwa kikosi cha kupambana na wavuvi haramu mkoani humo kufanya doria za mara kwa mara.