Katiba mpya, MAT wataka viongozi kutotibiwa nje.

Katiba mpya, MAT wataka viongozi kutotibiwa nje.Chama cha Madaktari Tanzania MAT kimeshauri kuwepo na kipengele katika katiba mpya ambacho kitasitisha udhamini na matibabu ya viongozi nje ya nchi.

Chama hicho pia kimeshauri kuondolewa adhabu ya kifo na kupiga marufuku utoaji mimba nchini.

Ni zamu ya Madakatari kutoa maoni yao mbele ya Tume ya maoni ya katiba mpya katika utaratibu wake wa kukutana na makundi maalum.

Dokta Primus Saidia ni Rais wa MAT anasema kuondolewa kwa kipengele hicho kutatoa nguvu kwa serikali kustawisha Sekta ya Afya na hivyo kuwa na fursa ya kutoa tiba za kada zote nchini.

Anasema fedha hizo zitasaidia kusomesha madaktari bingwa kukidhi hitaji na vifaa vya kisasa vya tiba badala ya kuendelea kutegemea huduma za kitabibu kutoka nje ya nchi.

MAT pia wameitaka tume ya marekebisho ya katiba kuangalia vipaumbele vya kitaifa kama afya, elimu, ardhi na ustawi wa jamii na miundombinu ili vitungiwe sheria itakayotoa usimamizi madhubuti.

Tume ya katiba ipo katika mchakato wa kupokea maoni tofauti yatakayoingizwa kwenye katiba mpya kabla ya kujadiliwa katika mabaraza ya kati ya Wilaya katika hatua inayofuata.

Comments