CHADEMA champa siku 14 Waziri Kawambwa kujiuzulu

CHADEMA champa siku 14 Waziri Kawambwa kujiuzulu

Chama cha Demokrasia na Maendeleo CHADEMA kimetoa siku 14 kwa Waziri wa Elimu na Mafunzo ya Ufundi Dokta Shukuru Kawambwa kujiuzulu kutokana na matokeo mabovu ya mtihani wa kidato cha nne.

Kauli hiyo inatolewa siku moja baada ya baraza la mitihani la taifa NECTA kutangaza matokeo ya kidato cha nne mwaka 2012 ambapo asilimia sitini ya wanafunzi wote laki tatu na 67 elfu 750 waliofanya mtihani wamefeli.

Katika Viwanja vya Furahisha jijini Mwanza Mwenyekiti wa Chama cha Demokrasia na Maendeleo CHADEMA  Freeman Mbowe akiwahutubia wafuasi wa chama hicho na wananchi anasema matokeo hayo yanatokana na mfumo mbovu wa elimu nchini na kuwa ishara na watoto wa maskini kuendelea kukosa elimu thabiti..

Wabunge wa Chama hicho wamesema kupingwa kwa hoja ya Mbunge wa kuteuliwa Mheshimiwa James Mbatia ni wazi kuwa Tanzania haiwezi kupiga hatua katika Sekta za elimu na afya.

Changamoto hiyo ya kielimu imezungumzwa katika ufunguzi wa sera ya majimbo nchi nzima huku chama hicho kikiunda kanda 10 lengo likiwa ni kuimarisha utawala kuanzia ndani ya chama hicho ili kuleta sera ya mgawanyo wa rasilimali nchini.

Wakati huo huo, Mwenyekiti wa Chama cha NCCR Mageuzi James Mbatia amesema unahitajika mjadala wa kitaifa kuhusu kiwango na mfumo wa elimu nchini.

Anasema serikali ina wajibu wa kuunda Tume maalum itakayoainisha kero ambazo umma wa watanzania utazijadili ili kujenga mfumo mpya wa elimu ya Tanzania.

Siku moja baada ya Waziri wa elimu na mafunzo ya ufundi Dokta Shukuru Kawambwa kutangaza matokeo ya kidato cha nne, viongozi wa kisiasa na wazazi wanatoa mapendekezo ya kurejesha kiwango cha elimu nchini baada ya kushtushwa na kiwango cha ufaulu.

Mwenyekti wa Chama cha NCCR mageuzi ambaye ni Mbunge wa kuteuliwa Mheshiwa James Mbatia anaona suluhu ya haraka ni mjadala wa kitaifa na kuundwa Tume maalum itakayoshughulikia suala la elimu.

Susan Lyimo ni Waziri kivuli wa elimu na mafunzo ya ufundi kutoka CHADEMA anasema kushuka kwa elimu nchini ni matokeo ya kutothaminiwa kwa mwalimu na  kuwepo kwa mfumo usiokidhi mahitaji.

Takwimu zinaonyesha kuwa ni wanafunzi 1,641 pekee waliofaulu kwa kiwango cha daraja la kwanza huku wanafunzi waliopata Sifuri wakiwa ni zaidi ya laki mbili na elfu 40 sawa na asilimia 60.

Comments